Në prag të bisedimeve të reja për një armëpushim të mundshëm në Rripin e Gazës, të iniciuara nga administrata e Presidentit Donald Trump, Hamasi dhe Izraeli kanë shprehur pozicione të ndryshme, duke lënë në ajër fatin e një marrëveshjeje.

Grupi militant palestinez, i shpallur organizatë terroriste nga SHBA dhe disa fuqi perëndimore, ka lënë të kuptohet se është i hapur për negociata, por ka vendosur një kusht të pandryshueshëm: çdo marrëveshje duhet të çojë drejt përfundimit të luftës.

Nga ana tjetër, kryeministri izraelit Benjamin Netanyahu ka përsëritur vijën e ashpër të qeverisë së tij, duke u zotuar se “nuk do të ketë Hamas në Gazën e pasluftës”, duke nënkuptuar se çdo armëpushim duhet të pasohet nga eliminimi i plotë i këtij grupi nga territori palestinez.

Megjithëse presidenti Trump njoftoi të martën se Izraeli është i pajtuar për një armëpushim 60-ditor, asnjëra palë nuk e ka konfirmuar publikisht pranimin e plotë të këtij propozimi. Trump deklaroi se kjo periudhë dy mujore do të përdorej për të negociuar zgjidhjen përfundimtare të konfliktit, duke përfshirë edhe lirimin e pengjeve izraelite që ndodhen në duart e Hamasit.

Në një përpjekje për të rritur presionin mbi të dyja palët, Trump paralajmëroi se “kushtet për Hamasin do të përkeqësohen ndjeshëm” nëse refuzojnë ofertën, ndërsa tha se marrëveshja mund të arrihet brenda javës së ardhshme.

Në sfondin e deklaratave politike dhe pozicioneve të ngurta, popullsia civile në Gazë dhe Izrael vijon të vuajë pasojat e një lufte që duket ende larg fundit.