Pas një sulmi të armatosur në qytetin Pahalgam, Kashmir, ku u vranë 26 civilë dhe u plagosën 17 të tjerë, tensionet midis Indisë dhe Pakistanit janë rritur ndjeshëm. India akuzoi Pakistanin për lidhje me sulmuesit, megjithëse ende nuk ka paraqitur prova konkrete. Përgjegjësinë për sulmin e mori një grup i panjohur që quhet “Rezistenca e Kashmirit”.

Në përgjigje, India pezulloi vizat për shtetasit pakistanezë dhe nisi një fushatë diplomatike kundër Pakistanit. Si hakmarrje, Pakistani dje pezulloi vizat për indianët, mbylli hapësirën e tij ajrore për linjat ajrore indiane dhe ndaloi të gjithë tregtinë me Indinë, madje edhe përmes vendeve të treta.

Rajoni i Kashmirit, i kontestuar prej dekadash midis dy vendeve, është një ndër pikat më të nxehta në botë. Qeveria e Modit e hoqi autonominë e tij në 2019, duke vendosur kontroll të drejtpërdrejtë indian, çka ka përshkallëzuar tensionet dhe trazirat lokale.

Ekspertët paralajmërojnë se situata mund të përkeqësohet më tej: ka thirrje për një përgjigje ushtarake nga India, duke përmendur si precedent sulmet ajrore të Balakotit në 2019 ndaj Pakistanit. Pyetja kryesore tani është nëse India do të hakmerret duke shënjestruar grupe militante, apo do të kalojë një prag të ri duke goditur objektiva ushtarake pakistaneze.