Agjencia e Mbikëqyrjes Policore (AMP) në Rajonin Elbasan-Korçë ka zbatuar një urdhër të Prokurorisë për ekzekutimin e një vendimi të Gjykatës së Shkallës së Parë të Juridiksionit të Përgjithshëm në Korçë, e cila ka vendosur masën e sigurisë “Pezullimi i ushtrimit të një detyre ose funksioni publik” ndaj tre punonjësve të policisë. Ata janë dyshuar për kryerjen e veprave penale “Falsifikim i dokumentave” dhe “Shpërdorimi i detyrës”.

Të pezulluarit janë: N/Komisari I. T., Specialist Shërbimi në Stacionin e Policisë Kufitare Pogradec, Inspektor K. L. dhe Inspektor F. I., të dy me detyrë Trupë Shërbimi në të njëjtin stacion.

Vendimi i gjykatës ka ardhur pas hetimeve të drejtuara nga Drejtoria Rajonale e AMP-së Korçë, e cila ka referuar materialet për dyshimet e arsyeshme se këta punonjës të policisë, ndonëse kishin konstatuar më 28 dhjetor 2024 shtetasit E.P. dhe L.E. duke kryer peshkim të ndaluar në liqenin e Ohrit, me veprime dhe mosveprime të tyre, kanë favorizuar aktivitetin e paligjshëm të këtyre shtetasve, duke krijuar dyshime për përfitime të paligjshme.

Ky vendim vjen pas një hetimi të thelluar, dhe do të ketë pasoja të mëtejshme për ata që kanë shkelur ligjin në këtë rast.