Një ngjarje e rëndë dhe alarmante është shënuar në Përmet, ku një vajzë e re, 26-vjeçarja Lediana A., ka rrezikuar seriozisht jetën pas një pickimi nga një gjarpër helmues. Ngjarja ndodhi dy ditë më parë dhe zbuloi një boshllëk shqetësues në sistemin shëndetësor rajonal të vendit.

Lediana u dërgua fillimisht me urgjencë në Spitalin e Përmetit, por atje mungonte kundërhelmi – një medikament jetik në raste të tilla. Mjekët vendosën ta transferojnë vajzën në Spitalin Rajonal të Gjirokastrës, por edhe aty situata ishte e njëjtë: kundërhelmi mungonte.

Me helmin që po përhapej me shpejtësi në trup dhe gjendjen shëndetësore që po përkeqësohej, e reja u nis me urgjencë drejt Spitalit të Traumës në Tiranë, ku pas një odiseje prej afro 200 kilometrash, arriti më në fund të marrë injeksionin e kundërhelmit. Sipas mjekëve, ndërhyrja ka qenë vendimtare për t’i shpëtuar jetën dhe për të mos humbur këmbën e majtë, që po fillonte të nekrotizohej nga përhapja e helmit deri në zonën e kofshës.

Familjarët e Ledianës, të tronditur dhe të indinjuar, ngritën alarmin për mungesën e medikamenteve të domosdoshme në spitalet rajonale, duke akuzuar institucionet për papërgjegjshmëri dhe lënie të qytetarëve në mëshirë të fatit.

Ky incident tragjik flet qartë për mosfunksionimin e sistemit të furnizimit me barna esenciale në zonat rurale dhe të thella, ku çdo minutë vonesë mund të jetë fatale. Rasti i Ledianës vë në pah nevojën urgjente për pajisjen e spitaleve rajonale me kundërhelme dhe medikamente emergjente, për të shmangur tragjedi të mundshme në të ardhmen.

Ndërkohë, vajza ndodhet jashtë rrezikut për jetën dhe pritet të rikuperohet gradualisht nën kujdesin e mjekëve në Tiranë.