Ministrja e Shtetit për Administratën Publike dhe Antikorrupsionin, Adea Pirdeni, ka bërë publike për konsultim projektligjin për disa ndryshime dhe shtesa në Ligjin Nr.152/2013, “Për Nëpunësin Civil”, me synimin për të modernizuar dhe profesionalizuar më tej administratën publike shqiptare.

Në thelb të nismës qëndron përmirësimi i modelit të Shërbimit Civil, duke rritur efikasitetin e rekrutimit, transparencën, fleksibilitetin dhe motivimin e punonjësve, me qëllim që administrata të bëhet më konkurruese dhe tërheqëse për profesionistë të kualifikuar.

“Një administratë profesionale dhe e mbështetur në merita qëndron në themel të rrugëtimit të Shqipërisë drejt anëtarësimit në Bashkimin Europian,” — thekson Pirdeni.

Ndër ndryshimet kryesore të projektligjit përfshihen:

🔹 1. Standard unik rekrutimi për të gjithë administratën publike
• Rekrutimi mbi bazë merite do të shtrihet në të gjitha institucionet publike, edhe ato që aktualisht nuk janë pjesë e shërbimit civil.
• Procesi do të administrohet nga një Komision Kombëtar i Atestimit, me përfaqësim nga qeveria, institucionet e pavarura dhe qeverisja vendore.

🔹 2. Model i ri pranimi në nivelin hyrës
• Pranimi do të zhvillohet në dy faza:
1. Testim kombëtar i unifikuar nga Departamenti i Administratës Publike (DAP).
2. Konkurs specifik për pozicionin vakant, nën mbikëqyrjen e DAP.

🔹 3. Ristrukturim i rekrutimit për nëpunësit e nivelit të lartë drejtues
• Mandate 5-vjeçare të rinovueshme për Sekretarët e Përgjithshëm dhe titullarët e institucioneve.
• Shpallje individuale për çdo vakancë dhe kufizim të ndërhyrjeve diskrecionare në përzgjedhje.

🔹 4. Hapje më e madhe e sistemit ndaj profesionistëve të jashtëm
• Rritje e kuotës së rekrutimeve nga jashtë administratës nga 20% në 50% të pozicioneve vakante.
• Mundësi për qarkullim të ekspertëve midis sektorit publik dhe privat dhe për rikthim në shërbimin civil pas përvojave jashtë tij.

🔹 5. Strukturë e re pagash dhe vlerësimi performance
• Hiqet avancimi automatik në shkallët e pagës.
• Bonus vjetor për performancë të lartë, për një përqindje të kufizuar punonjësish.
• Sistem i ri vlerësimi me 5 nivele, në vend të 4 aktualëve, që synon të shpërblejë meritën dhe përkushtimin.

Projektligji, i hartuar në bashkëpunim me ekspertët e Programit “BE për Mirëqeverisjen” dhe të OECD/SIGMA, do të qëndrojë për konsultim publik nga 31 tetori 2025, duke përfshirë të gjitha grupet e interesit: institucionet publike, organizatat e shoqërisë civile, universitetet dhe partnerët ndërkombëtarë.

“Qëllimi ynë është një administratë që të funksionojë mbi bazën e meritës, profesionalizmit dhe besimit publik,” — përmbylli ministrja Pirdeni.