Vrasja makabre e Ilaria Sulës, 22-vjeçares shqiptare, vazhdon të tronditë opinionin publik italian, teksa hetimet po nxjerrin në dritë detaje të reja, që e bëjnë edhe më të errët këtë çështje. Së fundmi janë bërë publike mesazhet që autori i krimit, Mark Samson, ka dërguar nga telefoni i Ilarias shoqes së saj më të ngushtë, Maria Sofia, për të fshehur gjurmët e krimit.

Në përpjekje për të mashtruar shoqen dhe për të krijuar një histori të rreme mbi zhdukjen e Ilarias, Samson shkruante si të ishte vetë ajo, duke pohuar se ajo kishte takuar një djalë të ri dhe kishte vendosur të shkonte në shtëpinë e tij. “U takuam këtë mëngjes jashtë Sapiencës dhe më pyeti nëse do të dilja me të. Do fle në shtëpinë e tij sot”, thuhej në njërin prej mesazheve.

Për ta bërë mashtrimin më të besueshëm, në orën 19:42, Samson dërgoi një foto gjysmë të zhveshur, duke i ngjallur dyshime por edhe kureshtje mikeshës së Ilarias. Ajo reagoi: “O Zot, atëherë? E bëtë?”, ndërsa përgjigjja e Samson, që pretendonte se ishte Ilaria, ishte: “Po, kam bërë një marrëzi”.

Kur Maria Sofia pyeti se ku ndodhej, Samson shkroi:
“Nuk kam dëshirë ta them, Sofi. Dua të ndihem e lirë në çdo kuptim, pa pasur dikë që të më pyesë ku jam”, duke u përpjekur të forconte narrativën e një vajze që kishte vendosur të largohej me vullnet të lirë.
Më tej, kur iu kërkua lokacioni, ai shkroi:
“Nuk mundem, e dashur, më fal. Jam pothuajse në Napoli”.

Maria Sofia, e shqetësuar, u përpoq të ruante qetësinë:
“Ok, bëj si të duash, nuk po të gjykoj nëse ke shkuar në Napoli, por sigurisht nuk do ia tregoj te Markut”, pa e ditur ende që personi që po i shkruante ishte pikërisht Marku, njeriu që kishte vrarë shoqen e saj më të ngushtë.

Ky manipulim i tmerrshëm me mesazhe, i kryer pasi krimi ishte konsumuar, është tashmë pjesë kyçe e hetimeve, ndërsa Samson përballet me akuza për vrasje të paramenduar dhe manipulim të provave. Familja e Ilarias dhe mbarë komuniteti shqiptar në Itali kërkojnë drejtësi për 22-vjeçaren, jeta e së cilës u ndërpre në mënyrë barbare.