Kryeministri Edi Rama mbajti një fjalim të gjatë para kabinetit qeveritar dhe grupit parlamentar të PS-së në takimin e zgjeruar të zhvilluar sot, ku nuk kurseu kritikat ndaj opozitës, Prokurorisë dhe medias, ndërsa theksoi se objektivi kryesor mbetet anëtarësimi i Shqipërisë në BE deri në vitin 2030.

Rama akuzoi opozitën për “bomba artizanale” politike dhe median për amplifikim të zhurmës publike, ndërsa ngriti shqetësime edhe për atë që e quajti “një lëvizje sportive prokurorësh” në prag të mandatit të ri të SPAK.

“Ka filluar një garë për mandatin e ardhshëm të SPAK, duke prerë fletë-arreste me tufa për çështje që në rastin më të mirë nuk janë fare penale dhe në rastin më të keq hetohen në gjendje të lirë kudo në botë,” deklaroi Rama.

Ai solli si shembull një rast në Durrës, ku sipas tij “vetëm prokurori mbeti pa i prerë vetes fletën e arrestit”, si dhe përmendi rastin e një punonjëseje administrate, e cila prej pesë vitesh po përballet me kancerin dhe ka një fëmijë të mitur, por që gjithashtu është përfshirë në hetime.

Kreu i qeverisë theksoi se Shqipëria ndodhet përpara një faze të rëndësishme në procesin e integrimit europian, konkretisht në kapitullin e vlerësimit për pikat e ndërmjetme, të cilat i cilësoi si një test të lartë që kërkon përqendrim maksimal.

“Duhet ta kalojmë këtë test për disa muaj dhe kjo kërkon forcë dhe përqendrim. Pavarësisht shkopinjve nën rrota dhe bombave artizanale, ne duhet të qëndrojmë të fokusuar,” u shpreh Rama.

Në fund, ai bëri thirrje për vetëkorrigjim brenda mazhorancës dhe kërkoi ide nga deputetët dhe ministrat për të çuar përpara punën e qeverisë, duke theksuar se “pas debatit, duhet të përqendrohemi vetëm në një pikë: Shqipërinë në BE në vitin 2030”.