Policia e Korçës ka kapur një furgon me 22 klandëstinë, të cilët po transportoheshin nga dy persona, njëri prej të cilëve u arrestua ndërsa tjetri u shpall në kërkim.

Këta dy persona kundrejt shumave të para u kishin premtuar klandestinëve kalimin e kufirit me destinacion vendet e Bashkimit Europian.

Sipas policisë, klandestinët po transportoheshin me një furgon “benz”, ndërsa i arrestuari eshte shtetasi me iniciale F.Q 28 vjeç dhe u shpall ne kerkim bashkepunetori i tij.

Njoftimi i Policisë

“Specialistët për Hetimin e Trafiqeve të Paligjshme dhe Narkotikëve në Drejtorinë Vendore të Policisë Korçë, në bashkëpunim me Policinë Kufitare dhe Forcat Speciale “Shqiponjat” në vijim të operacionit policor “Perimetri”, kanë goditur një tjetër rast të aktivitetit kriminal në fushën e dhënies së ndihmës shtetasve të huaj, për kalim të paligjshëm të kufirit kundrejt shpërblimit, si rezultat i të cilit u bë kapja dhe arrestimi në flagrancë i shtetasit N. R., 41 vjeç, banues në Fier dhe u shpall në kërkim shtetasi F. Q., 28 vjeç, banues në Durrës.

Shërbimet e policisë, kanë kapur pranë fshatit Grabovicë, Pogradec, shtetasin N. R., me mjetin tip furgon “Benz”, duke transportuar 22 emigrantë të paligjshëm të cilëve kundrejt shpërblimit, iu kishte premtuar kalimin drejt vendeve të BE-së.

Nga veprimet e mëtejshme hetimore dyshohet se bashkëpunëtor me 41-vjeçarin, në këtë aktivitet kriminal, ishte edhe shtetasi F. Q., i cili u shpall në kërkim dhe po punohet për kapjen e tij”, thuhet në njoftimin e policisë.

Materialet në ngarkim të tyre i kaluan Prokurorisë të Rrethit Gjyqësor Korçë për veprime të mëtejshme.