I riu Binak Kabashi, me origjinë nga Shipoli i Mitrovicës, i plagosur rëndë nga të shtënat me armë zjarri dy ditë më parë pranë kodrës së Goricës në Podgoricë, ka ndërruar jetë në spital, pasi nuk mundi t’u mbijetojë plagëve të marra.

Lajmin tragjik e ka konfirmuar babai i tij, Ali Kabashi, përmes një postimi në rrjetin social Facebook, ku ka shprehur dhimbjen për humbjen e djalit të tij.

Ngjarja tronditëse u pasua nga një reagim të shpejtë të policisë malazeze. Autori i dyshuar i krimit, një 23-vjeçar me inicialet E.B., u arrestua disa orë pas ngjarjes, në zonën mes urës së Blazovit dhe asaj të Visecit në Podgoricë.

Hetimet për motivet e ngjarjes vazhdojnë, ndërsa autoritetet kanë premtuar zbardhje të plotë të rrethanave dhe ndëshkim të autorit sipas ligjit. Vrasja ka shkaktuar tronditje të madhe si në Podgoricë ashtu edhe në Mitrovicë, ku viktima kishte rrënjët familjare.