Anëtarët e Lëvizjes Vetëvendosje në Komisionin Qendror të Zgjedhjeve (KQZ) kanë kundërshtuar certifikimin e Listës Serbe për zgjedhjet lokale të 12 tetorit, duke argumentuar lidhjet e kandidatëve me institucionet paralele serbe.

Sami Kurteshi deklaroi se “më shumë se 90% e kandidatëve të Listës Serbe janë të anëtarësuar në institucione paralele serbe në Kosovë”. Ai kritikoi kandidaturën e Sasha Millosheviqit për kryetar të Novobërdës, duke theksuar se ai ka shërbyer si kryetar i Organit të Përkohshëm të Komunës së Gjilanit, emëruar nga qeveria serbe, dhe se kryen një rol “dyfish” në institucione të një shteti me synime agresive ndaj Kosovës.

Anëtari tjetër i VV-së, Alban Krasniqi, tha se Lista Serbe është “dorë e zgjatur e presidentit të Serbisë, Aleksandar Vuçiq”, duke shtuar se nuk përfaqëson interesat e komunitetit serb në Kosovë. Ai bëri thirrje që kolegët të votojnë kundër certifikimit.

Nga ana tjetër, Zyra e Partive Politike në KQZ rekomandoi certifikimin e Listës Serbe, duke argumentuar se të gjithë kandidatët kanë kaluar filtrat ligjorë. Anëtari i PDK-së, Arianit Elshani, njoftoi se do të abstenojë nga votimi, duke kërkuar sqarime nga institucionet e sigurisë.

Në këtë kontekst, Ambasada e SHBA-së në Prishtinë, përmes Anu Prattipati, shprehu shqetësimin se çdo përpjekje për të kufizuar pjesëmarrjen e partive serbe në zgjedhje mund të ketë pasoja negative. Ajo nënvizoi rëndësinë që komuniteti serb të ketë mundësi të plotë për të marrë pjesë në procesin zgjedhor.