Një punonjës policie është pezulluar nga detyra nën akuzën e shpërdorimit të detyrës, pas një incidenti të pazakontë në spitalin e Gjirokastrës. Sipas Agjencisë së Mbikëqyrjes Policore (AMP), polici, me inicialet S.K., është denoncuar nga një mjeke e spitalit “Omer Nishani” në Gjirokastër, e cila pretendon se ai ka nxjerrë armën e shërbimit gjatë një vizite mjekësore. Rrethanat e ngjarjes mbeten ende të paqarta.

AMP në rajonin e Vlorës dhe Gjirokastrës, në bashkëpunim me Prokurorinë pranë Gjykatës së Shkallës së Parë në Gjirokastër, ka marrë masën e sigurimit personal “Pezullim i ushtrimit të një detyre a shërbimi publik” ndaj oficerit, i cili shërben në Sektorin e zbatimit të masave plotësuese për kontrollin e territorit në Drejtorinë Vendore të Kufirit dhe Migracionit Gjirokastër. Ngjarja dyshohet të ketë ndodhur më datë 25 tetor 2024 dhe hetimet po vijojnë për të sqaruar të plotë rrethanat e saj.