Polici Rexhep Sejdiu, 61 vjeç, ka ndërruar jetë sot rreth orës 7:20 gjatë shërbimit në pikën kufitare në Jarinë. Zëvendësdrejtori i Policisë në Veri, Veton Elshani, ka bërë të ditur se trupi i Sejdiut është gjetur i pajetë gjatë ndërrimit të natës, dhe dyshohet se ka ndërruar jetë nga shkaqe natyrale. Rexhep Sejdiu ka qenë pjesë e Njësive Speciale të Policisë Kufitare dhe ka shërbyer me përkushtim gjatë ngjarjeve të ndryshme në zonën e Jarinjës.
Ministri i Brendshëm, Xhelal Sveçla, ka shprehur ngushëllime për familjen dhe kolegët e policit të ndjerë, duke e nderuar si një zyrtar të përkushtuar dhe të palodhur. Ai ka theksuar angazhimin dhe qëndrueshmërinë e Rexhep Sejdiut gjatë ngjarjeve në Jarinjë, përfshirë bllokimin 19-ditor.
“Me pikëllim të thellë kam pranuar lajmin e ndarjes nga jeta të Zyrtarit Policor Rexhep Sejdiu gjatë kohës që ishte në detyrë në Stacionin e Njësisë së Ndërhyrjes së Shpejtë të Kufirit në Jarinje.
Rexhep Sejdiun do ta kujtojmë si zyrtar të përkushtuar e të palodhur, të angazhuar në luftë kundër çdo kriminaliteti veçanërisht viteve të fundit në veriun e vendit tonë si pjesëtar i Njësisë së Ndërhyrjes së Shpejtë të kufirit. Bashkë me kolegët e tij, Rexhepi para një viti i rezistoi me qëndrueshmëri bllokimit 19 ditor në Jarinje pasi kishin arrestuar ish-zyrtarin policor Dejan Pantic.
Zyrtari policor Rexhep Sejdiu do të mbetet përherë në mendjet e të gjithë neve që kishim fatin ta takonim gjithnjë në nivel të detyrës e kolegëve që punuan e shërbyen çdo ditë bashkë me të”,
Trupi i pajetë i policit është dërguar për obduksion në Institutin e Mjekësisë Ligjore, dhe pas procedurave, do të dërgohet te familja për varrim. Ministri Sveçla ka shprehur se Sejdiu do të mbetet në kujtesën e të gjithë atyre që kanë pasur fatin ta njohin.
