Policia Bashkiake e Tiranës ka bërë thirrje sot që pronarët e automjeteve të braktisura të largojnë mjetet brenda 30 ditëve, përndryshe ato do të transportohen në vendin e përcaktuar për depozitimin e automjeteve të braktisura.

Nisma synon lirimin e hapësirave publike, përmirësimin e qarkullimit dhe krijimin e një qyteti më të rregullt. Autoritetet kanë ftuar qytetarët të raportojnë çdo mjet të braktisur duke dërguar foto dhe lokacion në numrin e telefonit 0689500030.

Kryeministri Edi Rama ka paralajmëruar edhe Rregulloren Kombëtare, e cila do të përcaktojë hapësirat që mund të shfrytëzojnë bizneset, duke lidhur çdo vendim për vendosjen e karrigeve ose tavolinave me kontribute për Fondin e Gjelbër.

Procesi i lirimit të hapësirave publike, pjesë e programit “Rilindja Urbane 2.0”, ka nisur në fillim të korrikut. Në portalin Hapësiraime.gov.al janë raportuar deri tani 10,351 raste, prej të cilave 7,137 janë zgjidhur, ndërsa 3,214 mbeten në proces.

Policia Bashkiake thekson se bashkëpunimi i qytetarëve është kyç për të rikthyer funksionalitetin e hapësirave publike dhe për të siguruar një ambient më të pastër dhe më të rregullt për të gjithë.