Policia e Kosovës ka vlerësuar se procesi zgjedhor i 9 shkurtit ka kaluar i qetë dhe pa incidente madhore që do të cenonin integritetin e tij.

Në një komunikatë për media, Policia njoftoi se plani operacional i paraparë për mbarëvajtjen e zgjedhjeve është realizuar me sukses në të gjithë territorin e Republikës së Kosovës.

“Procesi zgjedhor ka kaluar i qetë dhe pa ndonjë incident madhor që do ta cenonte atë. Plani ynë operacional është realizuar me sukses gjatë dhe pas zgjedhjeve,” thuhet në deklaratën e Policisë së Kosovës.

Sipas raportit, në koordinim me Prokurorinë e Shtetit, janë iniciuar gjashtë raste: katër për vepra penale kundër të drejtave të votimit dhe dy për sulm ndaj personit zyrtar dhe kanosje.

“Janë trajtuar edhe disa raste të tjera, të cilat në bashkëpunim dhe koordinim me prokurorët kompetentë janë evidentuar si shënime zyrtare,” theksoi Policia.