Policia Kufitare ka intensifikuar kontrollet me qëllim parandalimin dhe goditjen e krimeve ndërkufitare dhe kapjen e personave në kërkim. Si rezultat i operacionit të koduar “Five Charges”, është kapur dhe arrestuar Pllum Daci, një shtetas 52-vjeçar nga Kamza, i kërkuar ndërkombëtarisht.
Shtetasi Daci ishte shpallur në kërkim nga Interpol Roma më 24 korrik 2024 dhe ishte dënuar nga Gjykata e Napolit në Itali me 14 vjet e 10 muaj burg për 5 vepra penale: “Tentativë vrasje”, “Grabitje”, “Kanosje”, “Vjedhje” dhe “Shfrytëzim prostitucioni”. Për të mbetur për të kryer 13 vjet e 9 muaj burg.
Operacioni u realizua në Portin e Durrësit, ku Daci po tentonte të merrte një automjet të dërguar nga jashtë shtetit nga të afërm të tij. Pas arrestimit, ai u vendos në pranga me qëllim ekstradimin në Itali. Interpol Tirana po bashkëpunon me Interpol Romën për realizimin e ekstradimit të tij.
