Gjykata e Fierit ka dënuar me 25 vite burg shtetasin Laert Hasalla, 34 vjeç, banues në fshatin Garunjas të Lushnjës, për veprën penale “Vrasja në rrethana cilësuese”, e mbetur në tentativë.

Vendimi u ekzekutua nga Specialistët për Hetimin e Krimeve të Rënda në DVP Fier. Hasalla ndodhej më herët nën masën e sigurisë “arrest në shtëpi”, pasi dyshohej se kishte porositur vrasjen e shtetasit M. H., ngjarje e ndodhur në vitin 2023, për motive gjakmarrjeje.

Sipas hetimeve, 34-vjeçari kishte paguar shtetasin M. M., 31 vjeç, tashmë i dënuar, për të kryer atentatin. Ky i fundit ka qëlluar me armë zjarri në drejtim të një automjeti, me synim eliminimin e shtetasit M. H.

Si pasojë e të shtënave, mbeti e plagosur shtetasja B. S., e cila udhëtonte në të njëjtin mjet me objektivin e atentatit.

Autoritetet bëjnë me dije se vendimi i gjykatës vjen pas një procesi të gjatë hetimor, ku u dokumentua roli i Laert Hasallës si porositës i krimit. Materialet procedurale janë administruar plotësisht, ndërsa i dënuari do të vuajë dënimin në një institucion të vuajtjes së dënimit në vend.