Nëndrejtoria e Sigurisë së Pireut ka arrestuar një shtetas shqiptar në Egjinë, 36-vjeçar, i cili akuzohet për përdhunim dhe akte seksuale me të mitur, shkelje të legjislacionit për të dhënat personale, armëmbajtje pa leje dhe posedim droge.

36-vjeçari dyshohet se nga viti 2013 ka abuzuar me vajzën e mitur të partneres së tij, një 50-vjeçare gjithashtu shtetase shqiptare, e cila gjithashtu është arrestuar, ndërsa ndaj saj është ngritur një dosje për shkelje të legjislacionit për armët. Ngjarja dyshohet se është raportuar nga viktima, tashmë 25-vjeçare.

Sipas të njëjtave informacione, ajo dyshohet se ka pohuar se 36-vjeçari, pasi ka filmuar aktet e pahijshme, e ka kërcënuar se do t’i publikojë ato në internet.

Pas kontrollit në pronën dhe shtëpinë e dy shqiptarëve u gjetën dhe u konfiskuan 1505 gram kanabis, një armë, 4 thika, shuma prej 18.275 euro, 3 peshore precize, dhe 3 celularë. Të arrestuarit janë dërguar në Prokurorinë kompetente.