Presidenti i Republikës, Sh.T.Z. Bajram Begaj ka dekretuar datën 4 gusht 2024 për zhvillimin e zgjedhjeve të reja për kryetar bashkie në bashkinë Himarë. Vendimi erdhi pasi Këshilli i Ministrave njoftoi zyrtarisht për vakancën e krijuar në këtë bashki për shkak të pavlefshmërisë së mandatit të fituar nga z. Dhionisios (Alfred) Petro Beleri, i dënuar për “korrupsion aktiv në zgjedhje”.
Në përputhje me njoftimin dhe kërkesën për caktimin e datës së zgjedhjeve, Presidenti Begaj thirri në konsultë z. Ilirjan Celibashi, Komisioner Shtetëror i Zgjedhjeve, për të diskutuar kapacitetet dhe gatishmërinë për menaxhimin e procesit zgjedhor. Pas konsultimeve, data 4 gusht u konsiderua si më e përshtatshmja për të lejuar përgatitjen e duhur të fushatës zgjedhore dhe administratës zgjedhore, duke marrë parasysh edhe sezonin turistik që rëndon bashkinë Himarë.
