Presidenti i Shteteve të Bashkuara, Joe Biden, ka shprehur kundërshtimin e tij ndaj një ofensive tokësore nga Izraeli në Liban, duke bërë thirrje për një armëpushim në një kohë kur tensionet në rajon janë përshkallëzuar pas vrasjes së liderit të Hezbollahut, Hassan Nasrallah. Hezbollahu, një grup militant dhe njëkohësisht parti politike që ka kontroll mbi pjesën jugore të Libanit, është bërë qendra e tensioneve të fundit.

Kur u pyet nga gazetarët nëse ishte në dijeni të planeve të Izraelit për një operacion tokësor dhe nëse ishte në paqe me këtë vendim, Biden u përgjigj: “Jam më i informuar nga sa mund të mendoni dhe jam i qetë me ndalimin [e planit për operacion tokësor]. Duhet të kemi një armëpushim tani”.

Ky reagim vjen pas komenteve të ministrit izraelit të Mbrojtjes, Yoav Gallant, i cili aludoi se Izraeli po përgatitet për një ofensivë tokësore në Liban. Duke folur me trupat izraelite në kufirin verior, Gallant e përshkroi vrasjen e Nasrallahut si një hap të rëndësishëm, por theksoi se Izraeli do të përdorë “të gjitha aftësitë” e tij për të përballuar kërcënimin nga Hezbollahu.

Hezbollahu, që ka vend në Parlamentin libanez, është shpallur organizatë terroriste nga SHBA, ndërsa Bashkimi Evropian e ka në listën e zezë vetëm krahun e tij të armatosur, jo partinë politike. Sulmet e fundit izraelite kanë vrarë disa nga komandantët e lartë të Hezbollahut, duke intensifikuar tensionet mes të dy vendeve.