Presidenti i Francës, Emmanuel Macron, ka bërë thirrje për krijimin e një rendi të ri botëror, duke e cilësuar rendin aktual si “të mangët dhe të padrejtë.” Në fjalimin e tij gjatë hapjes së “Takimit për Paqe,” organizuar nga komuniteti katolik Sant’Egidio në Paris, Macron trajtoi një sërë çështjesh globale, përfshirë marrëdhëniet me Rusinë, organizimin e Bashkimit Evropian (BE), dhe strukturën e sistemit ndërkombëtar.

Macron theksoi se pas përfundimit të luftës mes Rusisë dhe Ukrainës, është e nevojshme të rishikohen marrëdhëniet e Francës me Rusinë dhe të mendohet për një organizim të ri evropian. Ai theksoi se duke pasur parasysh pozicionin gjeografik, Evropa nuk mund të identifikohet vetëm si BE apo NATO, duke lënë të hapur mundësinë për një strukturë më të gjerë të bashkëpunimit kontinental.

Në kritikat e tij ndaj sistemit ndërkombëtar aktual, Macron theksoi se shumë vende me popullsi të madhe nuk kanë përfaqësim të mjaftueshëm në forumet ndërkombëtare. Sipas tij, ekziston një nevojë urgjente për një rend botëror ku askush nuk mund të bllokojë të tjerët dhe ku vendet janë të përfaqësuara siç duhet. Ai kërkoi që institucionet ndërkombëtare, si Kombet e Bashkuara, Banka Botërore dhe Fondi Monetar Ndërkombëtar, të reformohen për t’u bërë më të drejta dhe përfaqësuese.