Presidenti Ilir Meta, në kuadër të vizitës së tij në Kosovë, u prit sot në një takim nga kryeministri, Albin Kurti, me të cilin bashkëndanë urimet më të përzemërta me rastin e festës kombëtare, Ditës së Flamurit.
Në njoftimin e Presidencës, thuhet se temë e bisedës mes Metës dhe Kurtit ishin marrëdhëniet dhe marrëveshjet mes dy vendeve si dhe zgjedhjet lokale të zhvilluara në Kosovë.
Në këtë kuadër, Presidenti Meta dhe Kryeministri Kurti theksuan forcimin e bashkëpunimit në fushën e politikës së jashtme, të sigurisë, si dhe për angazhimin e përbashkët në projekte infrastrukturore, që do të kenë impakt të rëndësishëm në zhvillimet ekonomike e sociale të vendeve tona, siç është ndërtimi i linjave hekurudhore Durrës – Prishtinë dhe Shkodër – Gjakovë.
Në prag të mbledhjes së përbashkët të të dy Qeverive në Elbasan, Presidenti Meta shprehu besimin dhe nevojën që marrëveshjet që janë finalizuar e do të nënshkruhen, të konkretizohen në praktikë, për t’i shërbyer në mënyrë thelbësore forcimit të lidhjeve, si dhe përmirësimit të jetës së qytetarëve tanë.
Kreu i Shtetit shqiptar shprehu mbështetjen e tij për të gjitha nismat rajonale gjithëpërfshirëse, si Procesi i Berlinit, që garantojnë konsolidimin e bashkëpunimit ndërmjet të gjitha vendeve, faktor kyç për garantimin e stabilitetit, sigurisë dhe paqes në rajon.
Në bisedën e hapur për rëndësinë e përshpejtimit të procesit të dialogut me Serbinë, Presidenti Meta theksoi se është mjaft e rëndësishme konsultimi dhe mbështetja nga të gjitha forcat politike në Kosovë.
