Presidenti i Serbisë, Aleksandar Vuçiq, ka komentuar protestat dhe bllokadat e studentëve, duke theksuar se qeveria nuk ka ndërmend të përdorë forcë kundër askujt, por se do të përdorë masa shtrënguese vetëm nëse do të jetë e detyruar. Sipas Vuçiq, të gjitha kërkesat e studentëve janë përmbushur, por ai ka akuzuar protestuesit se kanë një agjendë politike dhe se kjo tashmë nuk është më çështje e studentëve, por një temë e nxitur nga politika.

Presidenti theksoi se do të presin deri në momentin që të detyrohen të reagojnë, veçanërisht në rastin e bllokadave të dhunshme të autostradave dhe infrastrukturës tjetër. Ai hodhi poshtë akuzat nga disa figura të opozitës dhe figura publike që e lidhin retorikën e tij me përplasjen e një makine në një studente gjatë bllokadës në Beograd, duke mohuar çdo lidhje me ngjarjen. Për më tepër, Vuçiq përsëriti se nuk do të pranojë një qeveri tranzitore, kërkesën e opozitës për të cilën tha se nuk ka vend në politikën serbe.