Presidentja e Republikës së Kosovës, Vjosa Osmani, ka pritur sot në takim ambasadorin e Republikës së Turqisë në Kosovë, Sabri Tunç Angılı. Gjatë takimit, ata diskutuan për zhvillimet politike në vend dhe mundësitë për thellimin e mëtejshëm të marrëdhënieve bilaterale mes dy shteteve.

Presidentja Osmani vlerësoi mbështetjen e vazhdueshme të Turqisë dhe theksoi rëndësinë e marrëdhënieve miqësore dhe strategjike mes Kosovës dhe Turqisë. Ajo e konsideroi Turqinë një partner të rëndësishëm dhe mbështetës të fuqishëm të Kosovës në arenën ndërkombëtare.

Në këtë kontekst, Osmani theksoi nevojën për vazhdimin e mbështetjes turke ndaj Kosovës në proceset e integrimit ndërkombëtar, përfshirë anëtarësimin në organizata ndërkombëtare dhe njohje të mëtejshme, si dhe thellimin e bashkëpunimit në fushën e mbrojtjes.

Ambasadori Angılı mbështeti qëndrimin e Presidentes dhe shprehu angazhimin e Turqisë për avancimin e marrëdhënieve të përbashkëta dhe përforcimin e lidhjeve miqësore dhe bashkëpunimit afatgjatë mes dy shteteve.