Kontrolli i Organizmit të Zgjedhjeve të Primareve në PD konfirmoi se me 13 nëntor do të bëhet rankimi i kandidatëve, të cilët më pas, do kenë të drejtën të shpalosin programet e tyre në një fushatë që do zgjasë 21 ditë.

“Kemi dy operacione që po ndodhin dhe KOKOE është përgjegjëse: regjistrimi i kandidatëve dhe fillimi i procesit në degët kryesore për regjistrimin e simpatizantëve. Ne mendojmë se data e përshtatshme për të bërë përzgjedhjen e kadidatëve përfundimtare do të jetë 6-13 nëntor. Këtu përcaktohen edhe dy gjera të rëndësishme që nuk i kemi pasur në primaret e para më 6 mars: vendosja e balotazhit dhe vendosja e një debati midis kandidatëve të PD në primare që vlen për anëtarët, simpatizantët dhe të gjithë të tjerët që janë të interesuar ta ndjekin”, tha Eno Bozdo ne një deklaratë për shtyp.

Sipas Albana Vokshit, data 4 dhjetor është caktuar për mbajtjen e garës për primaret. Ndërkohë, afati i fundit i kandidatëve për dorëzimin e dokumenteve për bashkinë e Tiranës, Durrësit dhe Elbasanit është vendosur 6 nëntori, kurse bashkitë e tjera kanë kohë dy ditë më tepër, përkatësisht me 8 nëntor, në orën 20:00.