Në Shtetet e Bashkuara janë bërë publike detaje të reja lidhur me padinë e ngritur ndaj Priscilla Presley, 80-vjeçares e cila akuzohet për fshehje të bizhuterive dhe kujtimeve të rralla të Elvis Presleyt, si dhe për tentativë kontrolli mbi pasurinë familjare të Presley-ve.

Padia është ngritur nga ish-partnerët e biznesit të Presley-t, Brigitte Kruse dhe Kevin Fialko, të cilët kërkojnë dëmshpërblim prej të paktën 50 milionë dollarësh. Ata pretendojnë se Priscilla ka tentuar të marrë nën kontroll fondacionin e vajzës së saj, Lisa Marie Presley, dhe trashëgiminë ikonike të Elvisit, Graceland, duke shkelur kontratat dhe duke kryer mashtrim të qëllimshëm.

Një nga akuzat më të rënda lidhet me momentin tragjik të janarit 2023, kur Lisa Marie pësoi arrest kardiak në shtëpinë e saj në Kaliforni. Dokumentet e reja tregojnë se Priscilla ka kërkuar që aparatet që e mbanin në jetë vajzën të fikeshin vetëm pak orë pas pranimit në spital, duke shkaktuar reagime të forta në publik.

Priscilla Presley ishte e martuar me Elvis Presley nga viti 1967 deri më 1973, marrëdhënia e tyre ka qenë gjithmonë nën vëzhgim publik, pasi ata u njohën kur ajo ishte 14-vjeçare dhe Elvis 24-vjeç. Ajo ka pohuar gjithmonë se marrëdhënia intime ka filluar vetëm pas mbushjes së moshës 21 vjeç.

Padia tashmë po shqyrtohet nga Gjykata e Lartë e Los Anxhelosit, duke ndezur një debat të gjerë në media dhe tek fansat e familjes Presley mbi përfshirjen e Priscillës në çështjet e trashëgimisë së Elvisit dhe kujdesit ndaj vajzës së saj.