Pushimi ndërkombëtar ka sjellë shqetësime për Real Madridin, me tre lojtarë të rëndësishëm që janë dëmtuar gjatë pjesëmarrjes me kombëtaret e tyre.

Dean Huijsen u tërhoq herët nga kombëtarja e Spanjës, ndërsa Kylian Mbappé dhe Franco Mastantuono u rikthyen më herët nga kombëtaret e Francës dhe Argjentinës për shkak të lëndimeve.

Mbappé pësoi një goditje në kyçin e këmbës gjatë fitores 3-0 të Francës ndaj Azerbajxhanit, duke u detyruar të largohej para përfundimit të ndeshjes. Federata e Futbollit e Francës konfirmoi se ai nuk do të mund të luajë më 13 tetor ndaj Islandës në Reykjavik.

Sipas gazetës Diario AS, lëndimi i Mbappé konsiderohet i lehtë, megjithëse do të nevojiten teste të mëtejshme mjekësore për të përcaktuar shkallën e plotë. Ai mund të jetë i gatshëm për ndeshjen e ardhshme të Real Madridit kundër Getafes, por nuk ka siguri të plotë.