Në një iniciativë të rëndësishme për të përshpejtuar procesin drejt anëtarësimit në Bashkimin Evropian, Kuvendi i Shqipërisë ka prezantuar një projekt-rezolutë për thellimin e reformave për mirëqeverisjen, sundimin e ligjit dhe antikorrupsionin për Shqipërinë në 2030.

Rezoluta thekson nevojën për dialog politik dhe institucional, si dhe bashkëpunimin e të gjithë aktorëve institucionalë për të përmbushur detyrimet dhe rekomandimet e Bashkimit Evropian dhe SHBA-ve për avancimin e reformave dhe forcimin e shtetit të së drejtës në vend.

Në bazë të Kushtetutës së Republikës së Shqipërisë dhe ligjit, si dhe në përputhje me rekomandimet e Raportit të BE për Shqipërinë 2023 dhe Raportin Screening të Komisionit Europian, rezoluta synon të përqendrojë përpjekjet në thellimin e reformave për të garantuar një sistem të pavarur, transparent dhe efikas të drejtësisë, si dhe në luftën kundër korrupsionit dhe për respektimin e të drejtave të njeriut.

Për të arritur këto qëllime, Kuvendi angazhohet për të nxitur dialogun konstruktiv dhe bashkëpunimin midis institucioneve të pavarura dhe aktorëve të shoqërisë civile në vend, si dhe për të rritur rolin e tij monitorues dhe mbikqyrës në funksion të mirëqeverisjes dhe sundimit të ligjit në të gjitha nivelet e qeverisjes.

Rezoluta thekson gjithashtu nevojën për të forcuar zbatimin e ligjit dhe luftën kundër korrupsionit në të gjitha nivelet e qeverisjes dhe administrimit të pasurisë publike, duke u bazuar në rekomandimet e BE-së dhe SHBA-ve.

Në fund, Kuvendi shpreh besimin në mundësitë e vendit për të përmbushur objektivat strategjike të anëtarësimit në Bashkimin Evropian në vitin 2030, duke u përqendruar në reforma thelbësore dhe forcimin e shtetit të së drejtës në përputhje me standardet evropiane dhe ndërkombëtare.