Prokuroria e Tiranës ka kërkuar masën e sigurisë “Arrest në burg” për Jetnor Zhaboli, 35-vjeçarin i cili është arrestuar pasi dyshohet se mbante mbyllur familjarët e tij në banesë në Tiranë. Kërkesa për masë sigurie është bërë deri në daljen e ekspertizës mjeko-ligjore, e cila do të përcaktojë gjendjen e shëndetit mendor të të arrestuarit.

Gjatë ndjekjes së tij nga autoritetet, Jetnor Zhaboli akuzohet për ndalim të komunikimit me anëtarët e familjes së tij, duke përfshirë bashkëshorten, fëmijët dhe nënën. Akuzohet gjithashtu për ushtrimin e dhunës fizike dhe psikologjike në mënyrë të vazhdueshme. Është theksuar se 35-vjeçari kishte instaluar një sistem të avancuar sigurie në shtëpinë e tij, përfshirë kamera, sistem alarmi dhe bllokues valësh, dhe kishte përgjuar familjen gjatë kohës. Seanca për masën e sigurisë është planifikuar të mbahet të hënën në orën 09:30 në Gjykatën e Tiranës.