Pas arrestimit të Gëzim Çelës në Kosovë, Prokuroria e Posaçme ka nisur procedurat për ekstradimin e tij drejt Shqipërisë. Prokuroria ka deleguar dosjen dhe provat për Çelën në Ministrinë e Drejtësisë, e cila brenda afatit kohor do t’i përcjellë autoriteteve kosovare dosjen për ekstradim, duke përfshirë vendimin e Gjykatës së posaçme për masën e arrestit me burg.

Gëzim Çela është akuzuar për trafik ndërkombëtar të drogës dhe konsiderohet si baroni i drogës. Gjykata në Ferizaj vendosi masën e arrestit prej 40 ditësh, një praktikë e zakonshme në procedurat e ekstradimit. Çela u arrestua në një operacion të përbashkët policor të Kosovës dhe Shqipërisë, duke u fshehur për 9 vite në Kosovë me një identitet të rremë si Bekim Bajraktari. Ai ishte shpallur në kërkim nga Shqipëria për akuzat e trafikut të drogës dhe mbajtjes së armëve luftarake pa leje.