Prokuroria pranë Gjykatës së Shkallës së Parë të Juridiksionit të Përgjithshëm, Tiranë ka përfunduar hetimet dhe ka dërguar në gjyq tre persona të përfshirë në përdorimin e dokumenteve të falsifikuara si vëzhgues gjatë zgjedhjeve të 11 majit 2025.

Të akuzuarit dhe veprat penale:
• Arlind Papa akuzohet për “Falsifikim të dokumenteve” dhe “Përvetësim të titullit apo detyrës shtetërore”.
• Gëzim Demiraj dhe Migena Xibinaku akuzohen për “Falsifikim të dokumenteve”.

Hetimet zbuluan se Arlind Papa kishte marrë pjesë si vëzhgues në qendrën e votimit në shkollën “9-Vjeçare Vorë” me një badge të falsifikuar të KQZ-së. Ai është sekretar organizativ i Partisë Socialiste dhe kishte detyrë të vëzhgonte edhe 43 qendra të tjera votimi në Bashkinë Vorë. Dokumentin e falsifikuar, sipas hetimeve, ia dha Gëzim Demiraj, sekretar i Përgjithshëm i Këshillit të Qarkut Tiranë, një ditë para zgjedhjeve.

Hetimet konfirmuan se as Papa, as Demiraj dhe as Xibinaku nuk kishin dokumente zyrtare të lëshuara nga KQZ, ndërsa përdorimi i dokumentit fals u krye me vetëdije dhe në bashkëpunim. Migena Xibinaku, sekretare në zyrën e protokollit të KQZ-së, ndihmoi në sigurimin e dokumentit të falsifikuar.

Prokuroria ka arritur në përfundimin se të tre shtetasit kanë konsumuar veprat penale për të cilat akuzohen, dhe materialet janë dërguar për gjykim.