Prokuroria e Tiranës ka zbuluar dhe goditur një skemë të organizuar mashtrimi me barnat e rimbursueshme, duke lëshuar 8 masa sigurie ndaj administratorëve të kompanive farmaceutike dhe zyrtarëve të Fondit të Sigurimeve të Kujdesit Shëndetësor (FSDKSH).

Në qendër të hetimeve ndodhet kompania “CFO Pharma”, në pronësi të biznesmenit Nadir Çausholli, dhe administratori i saj Frigul Milla, i shpallur në kërkim.

Në pranga ka rënë gjithashtu Spartak Zekja, ish-drejtor i FSDKSH, ndërsa disa punonjës të institucionit janë pezulluar ose u është ndaluar dalja jashtë vendit.

Skema e mashtrimit

Sipas hetimeve, Frigul Milla përdorte kompanitë “Pharma Plus” dhe “Medix Albania” për të paraqitur të dhëna të rreme mbi blerjet e barnave si “Foster” dhe “Trimboe”, që më pas shiteshin tek “CFO Pharma” për t’u rimbursuar në mënyrë të paligjshme nga fondet publike.
• Pharma Plus kishte deklaruar 2,000 kuti “Foster” dhe 1,107 kuti “Trimboe” në vlerë 10 milion lekë, pa asnjë blerje reale.
• Medix Albania kishte deklaruar 4,000 kuti “Foster” dhe 11,500 kuti “Trimboe” në vlerë 60 milion lekë.

Falsifikimet ishin miratuar nga zyrtarë të FSDKSH, të cilët lidhnin kontrata pa kontroll fizik të barnave, duke krijuar inventarë fiktivë dhe faturime të rreme që prodhuan përfitime të mëdha financiare.

Të arrestuarit dhe masat e sigurisë
• Frigul Milla – administrator i “CFO Pharma”, në kërkim, arrest në burg
• Spartak Zekja – ish-drejtor i FSDKSH, arrest në burg
• Alba Zylfo – ndalim dalje nga shteti, detyrim për t’u paraqitur
• Jona Berberi – ndalim dalje nga shteti, detyrim për t’u paraqitur
• Lorela Ballabani – ndalim dalje nga shteti, detyrim për t’u paraqitur
• Zade Mali – ndalim dalje nga shteti, pezullim nga detyra
• Esjana Gjishti – ndalim dalje nga shteti, pezullim nga detyra
• Romina Agalliu – detyrim për t’u paraqitur

Hetimet

Hetimet janë zhvilluar në bashkëpunim me Drejtoria e Hetimit Tatimor dhe Seksionin e Krimit Ekonomik në Policinë e Tiranës.

Prokuroria njofton se veprimet e të dyshuarve përbëjnë elementë të veprave penale “Falsifikimi i dokumenteve” dhe “Fshehja e të ardhurave”, sipas nenëve 186 dhe 180 të Kodit Penal.

Hetimet për këtë skemë mashtruese vazhdojnë, ndërsa pritet zbardhja e plotë e rrjetit të përfitimeve dhe lidhjeve mes kompanive farmaceutike dhe zyrtarëve publikë.