Partia Demokratike ka mbajtur sot protestën e 43-të radhazi para Bashkisë së Tiranës, ku ka kërkuar dorëheqjen e kryebashkiakut Erion Veliaj, të cilin e akuzon si pronarin faktik të inceneratorit të Tiranës, tashmë nën hetim nga SPAK për katër vepra penale.

Drejtuesi politik i PD për Qarkun e Tiranës, Belind Këlliçi, në fjalën e tij tha se Partia Socialiste nuk mund të quhet më forcë politike, duke akuzuar drejtues të saj për përfshirje në skandale dhe afera korruptive.

“PS nuk mund të jetë më një forcë politike që ka në burg ministra, deputetë e drejtorë të lartë të administratës, drejtorë të dënuar për përdhunim në grup, hajdutë vilash e xhepash. Kjo është një bandë kriminale dhe jo një parti politike,” – u shpreh Këlliçi.

Ai theksoi se SPAK po i jep kohë Erion Veliajt për të kërkuar azil politik në SHBA, por PD nuk do ta ndalë betejën për të sjellë drejtësinë. **”Veliaj ka shkuar tre herë në SHBA brenda dy javësh dhe nuk ka asnjë foto apo informacion për vizitat e tij. Ai po përpiqet të gjejë strehim politik, por ne nuk do ta lëmë,”** – tha ai.

Këlliçi premtoi se PD do të vijojë protestat dhe se më 12 maj, sipas tij, do të nisë një epokë e re për Shqipërinë me fitoren e kësaj force politike në zgjedhje. Beteja jonë është për qytetarët, për një Shqipëri të ndershme dhe të lirë nga korrupsioni,” – përfundoi ai.