Protesta e tetë e organizuar nga Aleanca për Mbrojtjen e Teatrit, së bashku me Rithemelimin dhe Partinë e Lirisë (PL), përpara Bashkisë së Tiranës, u shoqërua me tensione dhe dhunë. Protestuesit, të cilët numëroheshin me gishtat e dorës, hodhën tymuese dhe disa molotovë drejt godinës së bashkisë, e cila edhe këtë të martë ishte e rrethuar nga forca të shumta policore.

Ndryshe nga protestat e mëparshme, ku pjesëmarrja ishte më e madhe, kësaj here as militantët më besnikë nuk ishin të pranishëm. Protestuesit kërkuan sërish dorëheqjen e kryebashkiakut Erion Veliaj, pas arrestimit të disa drejtorëve dhe ish-drejtorëve të Bashkisë së Tiranës.

Kujtojmë se për protestën e shtatë, e cila u mbajt javën e kaluar, Policia e Tiranës ka nisur hetimet në gjendje të lirë ndaj 12 personave për episode dhune. Përfaqësuesja zyrtare e marrjes së lejes në polici për protestën, Adriana Kalaja, akuzohet për veprën penale “thirrje publike për veprime të dhunshme”. Sali Lushaj, ish-truproja i Sali Berishës, Tedi Blushi i Partisë së Lirisë, Klevis Balliu i Rithemelimit dhe Besart Xhaferri, kreu i FRPD, po hetohen për veprat penale “prishje e qetësisë publike” dhe “shkatërrim i pronës”.

Protestat për dorëheqjen e kryebashkiakut Erion Veliaj kanë përshkallëzuar shpesh në dhunë, me disa protestues të arrestuar për hedhjen e bombave molotov, të cilat rrezikuan jetën e efektivëve të policisë. Një nga qëllimet e këtyre protestave, siç është trumbetuar nëpër fjalime dhe me pankartat e përdorura, është lirimi i Sali Berishës nga arresti i shtëpisë.