Dhjetëra mijëra qytetarë në të gjithë Italinë i janë bashkuar të shtunën një manifestimi të përgjithshëm të thirrur nga sindikatat, në mbështetje të popullit palestinez në Gaza.
Pika më e nxehtë e protestave u shënua në Milano, në Stacionin Qendror të qytetit, ku demonstruesit me flamuj palestinezë u përplasën me forcat e rendit. Pamjet nga vendngjarja treguan protestues që thyen xhama të vitrinave dhe tentuan të hynin në ambientet e stacionit, ndërsa policia u detyrua të përdorte gaz lotsjellës për shpërndarjen e turmës.
Sipas raportimeve zyrtare, mbi një duzinë protestuesish u arrestuan, ndërsa rreth 60 efektivë policie mbetën të plagosur, 23 prej të cilëve u transportuan në spital për ndihmë mjekësore.
Tensionet nuk munguan as pranë konsullatës amerikane në Milano, ku protestuesit dogjën një flamur amerikan në shenjë revolte ndaj politikës së Uashingtonit në Lindjen e Mesme.
Protesta të ngjashme u zhvilluan paralelisht në Romë, Xhenova, Livorno, Marghera dhe Bolonjë, ku turma demonstruesish marshuan në rrugë me pankarta dhe slogane. Në disa qytete, grupe studentësh bllokuan hyrjet e universiteteve, duke e kthyer protestën në një akt simbolik kundër heshtjes së institucioneve akademike për konfliktin në Gaza.
Manifestimi i sindikatave italiane u cilësua si një prej më të mëdhenjve të viteve të fundit në vend, duke treguar tensionet në rritje që çështja e Gazës po shkakton në opinionin publik europian.
