Venedik – Themeluesi i Amazon, Jeff Bezos, dhe e fejuara e tij Lauren Sanchez do të martohen, por festa luksoze e tyre ka shkaktuar zemërim mes vendasve të qytetit historik italian. Festimet, të planifikuara për datat 24-26 qershor, do të mbahen në Venedik, një vend i njohur për trashëgiminë e tij botërore, por i frikësuar nga efektet negative të turizmit masiv.

Aktivistët vendas kanë intensifikuar fushatën “Nuk ka vend për Bezos” dhe kanë shfaqur mesazhe proteste si banderola me mbishkrimin “Jo Bezos” në kambanoren e bazilikës së San Giorgio-s në ishullin e shenjtë të San Giorgio-s, ku besohet se do të mbahet ceremonia.

Federica Toninello, organizatore e protestës, deklaroi se një nga vendet e mundshme për dasmën është ish-organizata bamirësie Misericordia, e transformuar tani në sallë eventesh. Ajo tha me vendosmëri:
“Bezos nuk do të shkojë kurrë në Misericordia. Ne do t’i mbushim rrugët me trupat tanë, do t’i bllokojmë kanalet me mjete shpëtimi dhe me varkat tona.”

Një tjetër protestuese, Na Haby Stella Faye, u shpreh:
“Kemi një shans për të prishur një dasmë dhjetë milionë dollarëshe – le ta bëjmë.”

Nga ana tjetër, kryebashkiaku milioner i Venedikut, Luigi Brugnaro, ka kundërshtuar protestat, duke i quajtur aktivistët “të turpshëm”. Ai siguroi qytetarët se dasma do të jetë e kontrolluar dhe nuk do të shkaktojë probleme për banorët dhe vizitorët.

“Vetëm 200 të ftuar do të jenë pjesë e ngjarjes, prandaj do të jetë e lehtë për Venedikun të menaxhojë dasmën pa shqetësime,” deklaroi Bashkia e Venedikut, sipas Today.com.

Ndërsa detajet e ceremonisë mbeten të fshehta, media është mbushur me thashetheme për fustanin e nuses, dhomat e hotelit dhe listën e të ftuarve, duke shtuar tensionin në këtë qytet historik, që përballet prej vitesh me sfidën e turizmit të tepruar.