Protestat në Serbi, që filluan në nëntor 2024, kanë marrë përmasa të mëdha, duke u shtrirë nga Beogradi edhe në qytete të tjera. Kërkesat kryesore të protestuesve përfshijnë:
• Zgjedhje të parakohshme parlamentare
• Llogaridhënie lidhur me tragjedinë në Novi Sad

Sipas Gurakuç Kuçit, hulumtues në Institutin për Studime të Luftës Hibride “Octopus”, situata politike në Beograd është e ngjashme me një anarki të kontrolluar, me incidente dhe dhunë ndaj protestuesve që shpesh lidhen me urdhra të presidentit Aleksandër Vuçiç.

Kuçi vlerëson se, edhe pse ka dhunë dhe tensione, Serbia nuk është ende në luftë civile, pasi protestuesit nuk janë të armatosur dhe nuk ekziston një “regjiment sulmues” që të sfidojë qeverinë.

Analisti shton se deklaratat e Vuçiçit, ku ai akuzon Perëndimin për financimin e protestuesve, janë manipulime që shërbejnë për të krijuar përçarje dhe për të larguar vëmendjen nga trazirat në vend. Për këtë, presidenti serb shpesh përdor veprime agresive ndaj Kosovës ose ndërmerr aksione kundrejt shteteve përreth.

Javën e kaluar, protestuesit sulmuan edhe godinën e partisë së Vuçiç, duke rezultuar me dhjetëra arrestime.

Situata mbetet e tensionuar, dhe sipas Kuçit, rreziku i përshkallëzimit ekziston nëse qeveria nuk realizon kërkesat e protestuesve, megjithatë aktualisht Serbia nuk ka hyrë në një luftë civile.