Me pankartën “Qytetërimi është më i fortë se krimi! Po na vrasin, duhet reagim!”, deputetë të Partisë Demokratike (PD) dhe protestues të mbledhur në qytetin e Shkodrës nisën një marshim proteste pas atentatit të 30 tetorit që la tre të vrarë dhe një të plagosur rëndë. Protesta filloi nga sheshi pranë bashkisë, duke vazhduar në pedonalen “Koli Idromeno” dhe përfundoi në sheshin “Nënë Tereza”. Para institucionit të prefekturës, marshuesit qëndruan për disa minuta në heshtje.

Deputeti i PD-së, Tomor Alizoti, bëri thirrje për reagim ndaj atyre që po marrin jetën e qytetarëve, ndërsa kreu i grupit parlamentar të PD-së, Gazment Bardhi, theksoi se qytetarët duhet të kundërshtojnë dhe të protestojnë kundër lidhjeve të ngushta mes krimit të organizuar dhe politikës.

“Së pari, ky është një organizim qytetar. Jemi këtu si qytetarë për të shprehur mosnënshtrimin tonë ndaj pushtetit që krimi i organizuar ka marrë në Shkodër dhe në të gjithë Shqipërinë. Ngjarja ishte e paralajmëruar dhe mund të ishte parandaluar. Pushteti i krimit të organizuar, i mbështetur nga lidhjet me politikën dhe qeverisjen, është një fenomen që duhet kundërshtuar,” tha Bardhi.

Protesta e Shkodrës është pjesë e një aksioni më të gjerë të “mosbindjes civile” të organizuar nga opozita, ku përfshihen edhe dy protesta të mëparshme: ajo e 29 tetorit, me bllokimin e rrethrrotullimeve kryesore kombëtare, dhe protesta e 7 tetorit në Tiranë, ku u hodhën molotovë drejt institucioneve shtetërore.