Sofje, 22 shkurt 2025 – Disa mijëra mbështetës të partisë ultra-nacionaliste “Rilindja” në Bullgari u përplasën me policinë të shtunën gjatë një proteste masive kundër planit të qeverisë bullgare për të miratuar euron vitin e ardhshëm. Protestuesit, duke brohoritur thirrje për “Dorëheqje” dhe “Jo Euros”, hodhën ngjyra të kuqe, fishekzjarrë dhe molotov në ndërtesën e misionit të Bashkimit Evropian në kryeqytetin Sofje. Ata madje i vunë flakën derës së përparme të ndërtesës para se policia të ndërhynte për t’i larguar.

Gjatë përplasjes, rreth 10 oficerë policie pësuan lëndime të lehta dhe gjashtë persona u arrestuan. Qeveria bullgare reagoi duke dënuar sulmin ndaj ndërtesave të BE-së, duke e cilësuar këtë si një akt “të papranueshëm” që “bie në kundërshtim me parimet e shtetit të së drejtës”.

Protestuesit, disa prej të cilëve valëvitnin flamuj bullgarë, të Bashkimit Sovjetik dhe të Gjermanisë Lindore, kërkuan që Bullgaria të mbajë monedhën e saj të pavarur, levin, dhe të refuzojë adoptimin e euros. Kostadin Kostadinov, kryetar i partisë “Rilindja”, tha për mediat: “Ne nuk duam euron. Ne duam të mbrojmë pavarësinë financiare të Bullgarisë.”

Ndërkohë, ekonomistët shohin një mundësi për rritje investimesh dhe përmirësime në sistemin e kreditimit të vendit nëse Bullgaria do të miratonte monedhën e përbashkët evropiane.