Kandidatët e Partisë Socialiste në pesë bashkitë që shkojnë në zgjedhje të pjesshme këtë të diel shprehen të bindur për fitore të thellë, një bindje që e ndan edhe kryeministri Edi Rama.

Në podkastin “Flasim”, të ftuar nga Rama, kandidatët prezantuan parashikimet e tyre:
• Brunilda Mersini (Vlorë): 80% të votave
• Gramoz Sako (Tepelenë): 83%
• Ervin Ceca (Berat): 75%
• Altin Bojni (Mat): 65%
• Florenc Doka (Cërrik): mbi 70%

Të gjithë theksuan se dita e zgjedhjeve do të reflektojë kulturën demokratike dhe mbështetjen e gjerë për PS-në. Mersini theksoi: “E diela do jetë ditë tjetër për qytetin tim, ka treguar që ka kulturë demokratike dhe këtë e ka treguar me fitoren e PS në zgjedhjet e 11 majit.”

Kryeministri Rama ironizoi opozitën, duke theksuar se PD-ja po përdor kandidatë të pavarur për të shmangur sfidën e drejtpërdrejtë, duke e lënë humbjen në dorë të tyre. Ai u kërkoi kandidatëve të PS-së të fokusohen te fshati, duke ndarë vëmendjen mes qytetit dhe zonave rurale për të mbështetur ndërmarrjet lokale.

Rama foli gjithashtu për rritjen e pensioneve me bonus mujor dhe për përmirësimin e pagës minimale nga 400 në 500 euro, si dhe komentoi vendimin e Gjykatës Kushtetuese për Veliajn, duke theksuar nevojën që qytetarët të kenë të zgjedhurin e tyre në kryeqytet.

Në përballjen e së dielës, kandidatët socialistë do të sfidojnë emra të pavarur të mbështetur nga opozita, por bindja e tyre mbetet e njëjtë: fitorja e PS-së parashikohet të jetë e thellë dhe bindëse.