Shumë njerëz reagojnë instinktivisht duke pirë ujë sapo ndiejnë djegësinë e ushqimeve pikante, por sipas ekspertëve, ky është një gabim. Shkencëtarët e Shoqatës Kimike Amerikane (ACS) shpjegojnë se uji nuk e neutralizon djegësinë, përkundrazi, mund ta përhapë edhe më shumë.

Si ndikon kapsaicina në ndjesinë e djegies?

Kapsaicina, substanca aktive që gjendet në specat djegës, lidhet me receptorët TRPV1 në gjuhë – të njëjtët receptorë që zbulojnë temperaturat e larta dhe acidet. Truri interpreton këtë lidhje si një “zjarr” dhe nxit mekanizma si etja, për të detyruar trupin të shpëtojë nga substanca irrituese.

Pse uji nuk ndihmon?
Kapsaicina është një substancë lipofile, që do të thotë se nuk tretet në ujë, por në yndyrna. Kur pimë ujë, në vend që ta neutralizojë djegësinë, ai e shpërndan kapsaicinën nëpër gojë, duke përkeqësuar ndjesinë e djegies.

Çfarë duhet të pimë në vend të ujit?

Ekspertët sugjerojnë se produktet e pasura me yndyrë janë më efektive për të zbutur djegësinë:
✅ Qumështi dhe kosi – Përmbajnë yndyra që shpërbëjnë kapsaicinën dhe proteinën kazeinë, e cila ndihmon në largimin e saj nga receptorët e dhimbjes.
✅ Akullorja – Jo vetëm që ka yndyrna, por edhe temperatura e ftohtë ndihmon në lehtësimin e ndjesisë së djegies.
✅ Vaji ose gjalpi – Nëse nuk keni produkte të bulmetit, një lugë vaj ulliri ose pak gjalpë mund të ndihmojnë.

Pra, herën tjetër që konsumoni ushqime pikante, mos e kërkoni menjëherë gotën e ujit – më mirë provoni qumësht ose kos për një lehtësim të shpejtë!