Një 45-vjeçar me origjinë shqiptare ka humbur jetën pas një aksidenti tragjik në vendin e punës në Mytilene, Greqi. Sipas mediave greke, viktima – identiteti i të cilit ende nuk është bërë publik – po kryente punime në çatinë e një shtëpie kur u rrëzua nga një lartësi e konsiderueshme, duke gjetur vdekjen e menjëhershme.

Dëshmitarët tregojnë se shqiptari punonte zakonisht në një restorant të zonës, por për të siguruar më shumë të ardhura pranonte herë pas here edhe punë të tjera, si ato të mirëmbajtjes dhe riparimeve në banesa.

Një akt heroik vetëm pak muaj më parë

Në fund të muajit gusht, i ndjeri ishte përmendur në mediat lokale si hero, pasi kishte shpëtuar një grua që kishte rrëshqitur në momentin që po hipte në një anije në port. Reagimi i tij i menjëhershëm i kishte shpëtuar jetën gruas, duke e bërë të njohur në komunitetin lokal.

Protestë pas ngjarjes tragjike

Qendra e Punës, e cila ndodhet pranë vendit ku ndodhi aksidenti, ka bërë thirrje për një protestë sot në orën 12:00, duke kërkuar më shumë siguri dhe masa mbrojtëse për punëtorët që shpesh kryejnë punë pa kontratë dhe pa pajisje mbrojtëse adekuate.

Autoritetet greke po vijojnë hetimet për të zbuluar rrethanat e plota të aksidentit.