Zyrtarët ukrainas dyshojnë se ditët e ardhshme mund të zbulohen masakra civile edhe më të rënda se ajo në Bucha.

Këto paralajmërime vijnë pasi në Borodyanka janë gjetur mbi 200 civilë të vdekur nën rrënoja. Edhe presidenti ukrainas, Volodymyr Zelensky ka thënë se numri në këtë qytet, mund të jetë edhe më i madh se sa në Bucha.

Zelensky tha se qyteti i Borodyanka mund të jetë një nga vendet që mund të ketë vuajtur më shumë se të tjerët.

Imazhet e tmerrshme të trupave të pajetë të vrara në rrugë në qytetin e Bucha kanë shkaktuar tronditje dhe reagime në mbarë botën.

Rusia mohon vrasjen e civilëve dhe thotë se Ukraina i ka inskenuar skenat e vrasjeve masive.

Qeveria ukrainase filloi një hetim për krime lufte pasi tha se trupat e 410 civilëve ishin gjetur në zonat përreth Kievit.

Disa u zbuluan në varre masive, ndërsa të tjerët kishin duart e lidhura dhe me sa duket ishin qëlluar nga një distancë e afërt.