Paneli Zgjedhor për Ankesa dhe Parashtresa (PZAP) ka pranuar ankesën e Lëvizjes Vetëvendosje për hapjen e të gjitha kutive të votimit që përmbajnë fletëvotime të dërguara nga diaspora për zgjedhjet e mbajtura më 9 shkurt.

Në vendimin e tij, PZAP ka udhëzuar Komisionin Qendror të Zgjedhjeve (KQZ) dhe Qendrën e Numërimit dhe Rezultateve (QNR) që të hapin 177 kuti të votimit dhe të rivlerësojnë 1631 fletëvotime të cilat më herët ishin shpallur të pavlefshme. Pas rivlerësimit, këto vota do të numërohen dhe do të përfshihen në rezultatet përfundimtare të zgjedhjeve.

Ndërkohë, PZAP ka rrëzuar dy ankesa të tjera të Lëvizjes Vetëvendosje lidhur me parregullsitë gjatë numërimit të votave me postë, duke i cilësuar ato të pasafatshme.

Ky vendim mund të ndikojë në ndryshimin e rezultateve përfundimtare, ndërsa mbetet për t’u parë si do të reflektohet ai në përbërjen përfundimtare të institucioneve të dala nga zgjedhjet e 9 shkurtit.