Qeveria vendosi sot mbylljen e Kolegjit Universitar Wisdom, pas skandalit të diplomave false që ka tronditur sistemin e arsimit të lartë. Në vendimin e Qeverisë përcaktohen detyrimet që i takojnë këtij institucioni, ndërsa vula e tij do të asgjesohet.

Kolegji Wisdom është i detyruar të përgatisë dosjen për çdo student që nuk ka përfunduar programin e studimit, duke siguruar të gjithë dokumentacionin e nevojshëm për transferimin e tyre në një institucion tjetër të arsimit të lartë që plotëson kriteret ligjore. Kjo dosje duhet të jetë në dispozicion të studentëve brenda 30 ditëve nga hyrja në fuqi e vendimit, pa asnjë detyrim financiar shtesë nga ana e tyre.

Përveç kësaj, Wisdom duhet të kthejë pagesat e kryera nga çdo student për pjesën e papërfunduar të programeve të studimit dhe çdo detyrim tjetër të papërmbushur. Institucionet e arsimit të lartë pranojnë aplikime për transferimin e studentëve të kolegjit universitar “Wisdom” deri më 20 nëntor 2024, për vitin akademik 2024-2025, në programe të njëjta apo të ngjashme studimi.

Detyrimet e tjera që ka Kolegji Wisdom përfshijnë:
a) Mbylljen e të gjitha veprimtarive akademike dhe kërkimore-shkencore për vitin akademik 2023-2024;
b) Përgatitjen e dokumentacionit për transferimin e studentëve;
c) Kthimin e pagesave të kryera për ciklin e papërfunduar të studimeve;
ç) Dorëzimin e dokumentacionit ligjor, administrativ, financiar dhe akademik në përputhje me kuadrin ligjor për arkivat;
d) Vendosjen në dispozicion të informacionit të kërkuar nga Ministria e Arsimit dhe Sportit.

Të gjitha shpenzimet për procedurat e mbylljes së Kolegjit Wisdom do të përballohen nga institucioni përkatës. Ministria e Arsimit, Qendra Kombëtare e Biznesit, Drejtoria e Përgjithshme e Arkivave, Qendra e Shërbimeve Arsimore dhe Agjencia e Sigurimit të Cilësisë në Arsimin e Lartë janë ngarkuar për zbatimin e këtij vendimi.