Qeveria shqiptare ka nënshkruar marrëveshjen me vlerë 100 milionë euro me Bankën Evropiane të Investimeve për ndërtimin e linjës hekurudhore Vorë-Hani i Hotit. Banka është një nga financuesit kryesorë të kësaj hekurudhe, e cila ka një gjatësi prej 120 kilometrash.

Pak javë më parë, është nënshkruar edhe një marrëveshje me BERZH për këtë projekt, për të marrë 98 milionë euro kredi. Kostoja totale e investimit është 373 milionë euro, ku një pjesë e rëndësishme do të mbulohet edhe nga buxheti i shtetit.

Kjo linjë hekurudhore lidh Vorën me Hanin e Hotit, duke shtrirë një distancë prej 120 kilometrash dhe ka rëndësi të veçantë në lidhjen rajonale në Ballkanin Perëndimor dhe integrimin me tregjet e BE-së.