Tensionet në Lindjen e Mesme janë përshkallëzuar sërish, pasi një raketë balistike e lëshuar nga rebelët Houthi të Jemenit ka rënë sot pranë Aeroportit Ndërkombëtar Ben Gurion në Tel Aviv, duke plagosur një person dhe pezulluar përkohësisht të gjitha fluturimet.

Sipas një deklarate të ushtrisë izraelite, sirenat e alarmit u dëgjuan në disa rajone të vendit pak para se raketa të përplasej në një zonë të pyllëzuar brenda perimetrit të aeroportit, afër hapësirës së parkimit. Një civil u plagos si pasojë e shpërthimit.

Autoritetet thanë se raketa nuk u ndalua dot, pavarësisht përpjekjeve për ta interceptuar. Nga momenti i lëshimit të saj në Jemen e deri në mbërritjen në hapësirën ajrore të Izraelit, kaluan vetëm disa minuta, duke ngritur shqetësime të mëdha për reagimin dhe kapacitetin mbrojtës të sistemit izraelit në këtë rast.

Autoriteti i Aeroporteve të Izraelit deklaroi:

“Po zhvillohet një hetim mbi shpërthimin pranë Aeroportit Ben Gurion. Si pjesë e procedurave standarde të sigurisë, është vendosur pezullimi i fluturimeve.”

Ky është një nga rastet më të afërta të goditjes së infrastrukturës kritike civile nga rebelët Houthi, që janë të mbështetur nga Irani dhe e kanë rritur aktivitetin e tyre ushtarak që nga fillimi i luftës në Gaza, duke synuar shpesh Izraelin dhe anijet ndërkombëtare në Detin e Kuq.

Incidenti pritet të shkaktojë reagime të ashpra nga ana e qeverisë izraelite dhe mund të përshkallëzojë më tej përplasjet në rajon.