Kreu i grupit parlamentar të PS, Taulant Balla, vlerësoi gjatë sesionit të ri parlamentar se kryeministri Edi Rama ka marrë një ftesë zyrtare nga presidenti amerikan, Donald Trump, për t’u angazhuar në Bordin e Paqes për Palestinën, duke e cilësuar këtë si një moment të jashtëzakonshëm për Shqipërinë.

Balla kritikon opozitën për mospranimin e këtij lajmi pozitiv, duke i dhënë një ultimatum për pjesëmarrje në komisionin e reformës zgjedhore dhe territoriale. “Nëse deri javën tjetër deputetët e opozitës nuk paraqiten në komision, ndryshimet do të realizohen vetëm nga deputetët e mazhorancës,” tha ai.

Ai shtoi se Shqipëria nuk është vetëm një vend anëtar i NATO-s, por edhe se Rama është partner i besueshëm për SHBA, dhe se koha për vonesa dhe diskutime të padobishme ka mbaruar.

Deklarata e Ballës erdhi në një moment tensioni, pasi opozita kishte bllokuar foltoren në sesionin e mëparshëm, duke kundërshtuar pjesëmarrjen e Belinda Ballukut dhe duke kërkuar mbledhjen e Këshillit të Mandateve dhe Imuniteteve.