Kryeministri Edi Rama ka folur sot dhe për drejtorin e ri të Policisë së Shtetit Muhamet Rrumbullaku si dhe akuzat e pak viteve më parë për të ashtuquajturin “grupi Çiftelia”.

Rama tha se Muhamet Rrumbullaku nuk vjen nga portalet në krye të Policisë së Shtetit, por vjen nga disa vite punë në drejtimin e AMP, pra një ndër drejtorët më të rëndësishëm dhe një ndër oficerët me eksperiencën më të gjatë dhe me karrierën më profesionale në Policinë e Shtetit dhe sipas tij, ato çiftelitë dhe ato daullet e risjella 10 vjet më mbrapa në skenë nuk kanë asnjë vlerë.

“Mbase këtë duhet ta merrni si një nga shembujt që ne nuk qeverisim duke i ndarë shqiptarët në të tanët dhe të atyre, dhe as nuk merremi me biografi në sensin politik dhe as nuk merremi me gjëra të kësaj natyre. Pra, nuk jemi një regjim patronazhistët siç thuhet dhe me këtë rast i përshëndes gjithë patronazhistët kudo ku janë se janë zemra e pazëvendësueshme e PS-së, por jemi një qeveri e cila vlerëson meritën.
Ju kujtoj që Muhamet Rrumbullaku nuk vjen nga portalet në krye të Policisë së Shtetit, por vjen nga disa vite punë në drejtimin e AMP, pra një ndër drejtorët më të rëndësishëm dhe një ndër oficerët me eksperiencën më të gjatë dhe me karrierën më profesionale në Policinë e Shtetit, kështu që ato çiftelitë dhe ato daullet e risjella 10 vjet më mbrapa në skenë për arsye që unë i di, por që nuk ka rëndësi fare t’i harxhojmë kohë publikut këtu, pse dhe nga kush dhe si, nuk kanë asnjë vlerë. Rrumbullaku është një vlerë morale me integritet të padiskutueshëm, të padiskutuar nga askush sa i përket aspektit të ndershmërisë profesionale dhe unë vërtetë uroj që ai të ketë sukses të plotë dhe ka gjithë mbështetjen tonë absolute në punën e tij dhe ka respektin e policisë së Shtetit, të tjerat janë për konsumin e përditshëm të vorbullës së llumit ku duhet të jetojmë fatkeqësisht të gjithë ne”, deklaroi Rama.