Gjatë një takimi me Brunilda Mersinin, kandidate e PS-së për Bashkinë e Vlorës, kryeministri Edi Rama i dha mesazh të qartë: brenda 100 ditëve duhet të presë “degët e pemës së nepotizmit” dhe të vendosë disiplinë te drejtuesit e bashkisë.

Rama kërkoi që të gjithë drejtorët e bashkisë të jenë në punë që në orën 7:30 të mëngjesit, duke i urdhëruar të mos bëjnë më sehir dhe të jenë pranë kandidate Mersini gjatë gjithë ditës. “Drejtori që nuk do t’i përmbahet këtij rregulli, të ikë”, tha Rama.

Brunilda Mersini u shpreh se synon të përmirësojë infrastrukturën dhe menaxhimin e qytetit, duke e bërë Vlorën të funksionojë 365 ditë në vit, jo vetëm gjatë sezonit turistik. “Besoj fort te stafi dhe aftësitë e mia drejtuese, për të pastruar dhe përmirësuar qytetin”, tha ajo.

Kryeministri shtoi se prioritet është spitali dhe shërbimet publike, por paralajmëroi: “100 ditë duhet krasitur e gjithë pema e nepotizmit, duke filluar nga kushëriri aty… Ta gjejnë vlonjatët.”

Mesazhi i Ramës është i qartë: menaxhim transparent dhe disiplinë në Bashkinë e Vlorës do të jenë test për kandidate Mersini që nga ditët e para pas marrjes së detyrës.