Më 16 maj, në Kotor të Malit të Zi, do të mbahet Samiti i rradhës BE-Ballkani Perëndimor. Ky samit do të sjellë bashkë liderët e vendeve të Ballkanit Perëndimor, përfshirë kryeministrat shqiptarë, Edi Rama, Albin Kurti dhe Talat Xhaferri, si dhe presidentin e Serbisë, Aleksandër Vuçiç.

Kryeministri malazez Milojko Spajiç dhe komisioneri për zgjerim Oliver Varhelyi do të drejtojnë këtë samit, në të cilin do të marrin pjesë edhe Ndihmëssekretari amerikan i Shtetit për Evropën dhe Euroazinë, James O’Brien.

Përveç liderëve politikë, në samit pritet të jenë prezentë edhe organizata partnere si Këshilli i Bashkëpunimit Rajonal, Banka Evropiane për Rindërtim dhe Zhvillim, Banka Evropiane e Investimeve, Banka Botërore, Komuniteti i Transportit, Aleanca Atlantike, Komuniteti i Energjisë, Fondacionet e Shoqërisë së Hapur, ReSPA, GIZ, si dhe përfaqësues të lartë të Komisionit Evropian dhe të tjerë.

Pak ditë para Samitit, më 15 maj, do të zhvillohet një takim i Ministrave të Çështjeve Evropiane dhe Financave të vendeve të Ballkanit Perëndimor, përfaqësuesve të Komisionit Evropian dhe organizatave partnere.

Këto takime vijnë në vazhdimësi të diskutimeve të ndryshme rajonale, ku udhëheqësit e rajonit dhe përfaqësuesit e BE dhe SHBA kanë shqyrtuar Planin e Rritjes për Ballkanin Perëndimor, i cili synon të përshpejtojë procesin e integrimit socio-ekonomik me BE-në, duke përfshirë grante dhe kredi në vlerë prej gjashtë miliardë euro.